اى دين أعتنق !!

ساعات لما اجى أنظر للأعتقادات المختلفة حول تصورهم لله والاخرة والبعث بعد الموت أجد ان كل واحد في تلك المذاهب عنده روحانياته الخاصة .. كل منهم آمن بذلك الاعتقاد لأنه يمس حاجة فى قلبه وتجد انه يبكى تأثرا لما يسمع موعظة هى فى أديان اخرى سخف وخطأ .. كنت لسه بأتكلم مع صديقة امبارح كانت بتقوللى ان كل واحد مؤمن انه هو اللى صح وانه يشعر بذلك من صميم قلبه .. وإن كل الاديان تدعو الى الفضيلة عمرك ما هتلاقى دين بيقولك اسرق او اقتل .. حسنا .. كلهم هكذا لكن بالتأكيد واحد منهم فقط على صواب على الأقل فى الاعتقاد بمعنى الاله ووحدانيته وشكل البعث والحساب .. فمن هو وأى معيار ارتكز عليه وانا بأفكر .. لما فكرت توصلت انك لا يمكن ان تعتمد على القلب وحده فى الايمان .. هناك فطرة اتفق عليها الناس كلهم لكن الفطرة تتغير وانت ما تقدرش تقول يقينا هل ما تفكر فيه هو فطرتك ام افكار مكتسبة من تأثير المحيطين بك .. العقل والعلم من اهم الدلائل للحقيقة .. لما تجى تنظر لمنهجية سيدنا ابراهيم عشان يعرف الله عز وجل وهو كان فى البداية مثلنا لا يملك اى دليل او وحى .. عمل ايه .. تأمل القمر وبدأ يفكر انه اكبر من باقى المخلوقات وبالتالى هو اله .. لما وجده يزول ولقى الشمس تأتى عليه قال هى الاكبر ولها الغلبة إذا هى اله .. لما رأها تذهب هى الاخرى قال لا يمكن ان يكون الاله فى حيز مكانى يروح ويجى .. المفروض انه لو اله يكون خلق الزمان فما بالك انه يتأثر به ويشرق ويغرب.. ونفى فكرة ان يكون الاله مخلوق لأنه كل ما يبدأ يؤمن بشىء يجد ان هناك ما هو اكبر واعظم منه فتوصل لحقيقة انه واحد فوق كل دول .. دعك من النتائج اللى وصل اليها بس انظر لطريقته فى التوصل للاله .. لم يقل والله انا حاسس من جوايا اوى انه موجود .. او انا شايف ان معتنقين المذهب هم امى وابى واخوتى واقرب الناس لى فهم بالتأكيد صح .. كان له منطق ومقارنات واستنباط عشان يوصل .. عشان كده انا بأعجب بمفكرى الغرب جدا لأنهم بيتسائلوا ومش تساؤل اللى عايز يشكك بل اللى عايز يعرف وهو الاهدى والاقرب انه يتوصل للحق بأذن الله ...